Ek bhikari bacha shehar ki rush bhari sark par rukki hui aik gari ke pass aaya. Uske chehre par thakan, kapron mein mail aur aankhon mein bhookh saaf nazar aa rahi thi. Driver ne samjha ke shayad ye bacha bhi dusre bhikariyon ki tarah paisay maange ga aur phir aglay signal par gaib ho jaye ga. Lekin jaise hi bacha gari ke kareeb aaya aur usne apni baat kahi to gari mein bethay log aik dum khamosh ho gaye.
Bache ne masoom si awaaz mein kaha: “Uncle, mujhe paisay nai chahiye, mujhe roti chahiye. Mujhe bohot bhook lagi hai.” Ye jumla sun kar sab ke dil ko jhatka laga. Aksar hum soch’te hain ke bhikari sirf paisay lena chahte hain aur phir shayad un paison ko ghalat jagah istemal karte hain. Lekin yahan ek masoom bacha tha jo sirf aik waqt ka khana mang raha tha. Uski bhook aur masoomiyat ne wahan maujood har shaks ko sochnay par majboor kar diya.
Driver ne foran apna lunch box nikaala aur bache ko de diya. Bache ki aankhen chamak uthi aur usne shukriya keh kar khana uthaya. Us waqt gari mein bethay logon ne ek ajeeb sakoon mehsoos kiya. Sab ne samjha ke insaniyat ka asal matlab paisay dena ya na dena nahi, balki zaruratmand ki asli zarurat ko samajhna aur usse poora karna hai.
Ye waqiya dil ko choo lene wala is liye bhi hai ke hum rozana kitna zyada khana zaya kar dete hain jo kisi bhookay ka pait bhar sakta hai. Kabhi hum restaurants mein plates mein aadha khana chor dete hain, kabhi ghar mein bachay hue chawal ya roti ko bin sochnay samjhnay kachray mein phenk dete hain. Aur isi waqt shehar ki kisi gali mein aik masoom bacha sirf roti ki talash mein bhatak raha hota hai.
Is chhoti si mulaqat ne ek bari naseehat de di ke insaan ka asli imtihaan us waqt hota hai jab uske samne ek bhooka insaan ho aur wo apne khane ka hissa usse de kar khud ko halka mehsoos kare. Paisay dena ya na dena ek choice hai, lekin roti dena ek zimmedari hai.
Ye waqiya sirf aik bache ka nahi, balkeh un tamam bhooke aur zaruratmand logon ka hai jo humari thodi si tawajjo aur madad se zinda reh sakte hain. Shayad humari thodi si qurbani kisi ke liye zindagi ban jaye, aur yahi insaniyat ka asal roop hai.